ساعات الواحدة كده تقعد مع نفسها.. وتحس إنها إتحرمت من متع كتيييييييييير
الدنيا حوليها مغرية وفي غيرها عايش حياته ومستمتع لأقصى درجة
وهي قاهرة نفسها ومنعا نفسها من حلاوة الدنيا
مش بتجيلكم ساعات زي دي كده؟
الواحدة مننا لما تقرب من ربنا، وتسعى إنها تكون بنت ملتزمة.. بتحرم نفسها من حاجات كتير علشان ترضي ربنا
علشان الحاجات دي حرام وربنا نهاها عنها
بس ساعات بصراحة بنضعف
بتشوفي صحبتك دي وهي لابساه اللبس اللي بتحبيه
الإستايل بتاعها اللي كان إستايلك في يوم من الأيام
بتشوفيها وهي لابسة الجينز مع البلوفر البينك والشنطة البينك.. وتتحسري
بيجيلك لحظة وبتتحسري
وتحسي إنك إتحرمتي من حاجة بتحبيها
بتشوفي أخوكي وهو عايش حياته مع خطيبته
خروج وفُسح وضحك
وهدايا في عيد الحب
يخرج معاها ومع شلة أصحابه ولاد وبنات ويهيصوا
مش بتحسي ساعات إنك إتحرمتي من المتعة دي
رغم إنك عارفة إنه كله حرام في حرام
تقعدي مع واحدة صحبتك كنتوا سوا في الشغل
بس إنتي سبتيه علشان الإختلاط فيه كان بزيادة
بس بتتحسري لما تحسي إن في يوم كان دي متعتك
حياة البساطة
كلنا زمايل ولاد وبنات من سن واحد
بنخرج سوا بعد الشغل وبناكل سوا في الشغل
بنهزر ونضحك ونحكي لبعضنا على كل حاجة
وتقولي في سرك يا خساااارة
بجد مش بيمر عليكي الإحساس ده؟!
الإحساس بالحرمان من محرمات الدنيا
طيب عايزاكي تعرفي إنك لما يجيلك الإحساس ده
تعرفي كويس إنه من إتنين
نفسك الأمارة بالسوء اللي عايزه تجرك للسوء
ومن الشيطان اللي عايزك ترجعيله
مفيش تالت
إفرحي أختي
إنتي على الحق
المتعة الحرام حلوة أه
بس مش دايمة
بس إلتزامك هو الدائم
متعتك لما تقرأي القرآن وتحفظي أياته.. مفيش بعدها حلاوة
صلاتك وإنتي حسه إن ربنا راضي عنك.. ملهاش بديل
في احلى من إنك تكوني من أهل الجنة
بالله في احلى من سيدنا محمد وحب سيدنا محمد
لأ مفيش
حب الله
حب الرسول
حب الجنة
هو ده اللي تتحسري عليه لو مش عايشاه
مش حب الدنيا
هي دي الخسارة بجد إنك تحبي الدنيا أكتر من حبك لربنا
إستعيذي بالله من الشيطان.. مش هينفعك ولا هينفعني